Kaso sa pawnshop batok siyudad gisibog

CEBU, Philippines — Gibasura sa Regional Trial Court ang kaso nga gisang-at sa tag-iya sa Jerome’s Pawnshop batok sa kagamhanan sa Siyudad sa Sugbo.

Kini human gisibog ni Diogenes Avila ang kaso samtang wala sab kini tubaga sa kagamhanan sa siyudad. Si Avila nikiha kang kanhi mayor Tomas Osmeña ug buhatan sa Prevention, Restoration, Order and Beautification Enhancement (PROBE) aron mapugngan ang pagpasirado sa ilang establisemento.

Gipasirado sa kagamhanan ang tanang sanga sa Jerome’s Pawnshop sa dakbayan tungod sa kapakyas niini sa pagkuha og lisensiya sa Bangko Sentral ng Pilipinas.

Sigun ni City Attorney Rey Gealon nga ang pagsibog sa kaso nagpasabot nga ang tag-iya sa pawnshop mahimo nga magproseso sa mga kinahanglanon alang kanila aron makuha ang permiso sa pagsugod sa ilang negosyo subay sa mando ni Mayor Edgardo Labella.

Si Atty. Carlo Vincent Gimena nagkanayon nga ang Business Permit and Licensing Office (BPLO) sa siyudad ang mosusi kun ang mga pawnshops nagsunod sa tanang kinahanglanon alang sa pagpagawas sa mga permiso sa negosyo.

Gipasabot ni Gimena nga ang BPLO ang mohimo og rekomendasyon ngadto ni Labella kung aprobahan ba o dili ang aplikasyon sa pagtugot sa negosyo.

Buot ni Labella nga maabi-abihon sa negosyo ang kagamhanan ubos sa iyang administrasyon. (/GMR)(BANATNEWS)