Mga namasahero nga kolorum sa Talisay gipatawag

CEBU, Philippines — Gipatawag ang tanang driver ug operator sa kolorum nga mga sakyanan nga magbiyahian sa Dakbayan sa Talisay ni traffic czar, Jonathan “Joy” Tumulak kagahapon sa buntag.

Kini isip tubag sa suwat nga ilang nadawat gikan sa action center sa 8888 hotline pinaagi sa Department of Interior and Local Government (DILG).

Matud ni Tumulak nga gikan sa multi-cab, sports utility vehicles ug mga van maoy ilang gitumong sa pagpasabot nga ang ilang gibuhat nga pagpamasahero gidili gyud kini. Wala hinuoy problema sa ilang tigum tungod kay andam ra man ang mga drayber ug operator sa pag-undang sa ilang gimbuhaton matag adlaw.

Hinoon nangayo lang sila og pakitabang ni Mayor Gerald Anthony “Samsam” Gullas Jr. aron maoy magsilbing taytayan aron sila makaestorya ug mohangyo sa direktor sa Land Transportation Franchising and Regulatory Board (LTFRB).

Nakasabot si Tumalak sa ilang hangyo base sab sa gidaghanon sa mga pasahero nga ilang mahatud sa ilang padulngan matag adlaw.

Gibana-bana nga moabot sa 50 ngadto sa 60 ka sakyanan ang magbiyahe kun diin ang matag usa mahimong makabiyahe pito ka rounds gikan sa Dakbayan sa Talisay hangtud sa Plaza Independencia. Ang malapason sa balaud nagkanayon si Tumulak nga mahimo gyud nilang dakpon. (/GMR)(BANATNEWS)