Pansitan, bihonan ikiha

CEBU, Philippines — Mag-atubang og kasong theft of minerals, anti-fencing law ug uban pang kasong administratiba ang kompaniya nga manghimo og bihon ug pansit sa Barangay Cansojong, Dakbayan sa Talisay.

Kini human nasayran nga ang CitiFood industries, Ming Food ug President Food nga naa sa usa ka compound maoy nipalit sa kwestiyonable nga coal nga nasita sa taga Department of Energy 7. Matud ni Atty. Russ Mark Gamallo, legal officer sa DOE-7, nga ilang nasakmit ang balor P33 milyones nga kantidad sa coal nga gisakay sa usa ka barge nga gidunggo sa Pier 8 sa Siyudad sa Mandaue.

Asoy pa niya nga ilang nahibaw-an nga ilegal diay ang ilang pag-transport niini ug ila pa gyud gibaligya. Nahibaw-an nga ang coal gikan sa Pagbilao Power Plant sa Quezon Province nga ang shipper mao ang TM Energy Philippines Incorporation unya ang consignee ang ENCOAL Corporation.

Apan base sa rekord sa DOE-7 nga giisyu sa ila ulohang buhatan nga ang Pagbilao Power Plant wala marehistro nga coal trader pero coal-end user lang kini.

Ang TM Energy nahibaw-an sab nga dili rehistrado nga trader hinungdan nga pag-abot sa barge sa Pier nakig-alayon dayon ang taga DOE sa Maritime Police, Mandaue City Police ug Philippine Coastguard.

Apan niadtong Lunes sa gabii nasuta nga nawagtang na ang cargo ug nahibaw-an nga naabot na kini sa Dakbayan sa Talisay.  Si Gamallo niingon nga gi-stock file ang coal base sa rekord nga gipakita sa bihonan ug pansitan nga nahibaw-an sab nga gikan sa ENCOAL Corporation.

Siya nagkanayon nga laing kaso sab ang ilang atubangon batok sa ENCOAL Corporation. Gisuwayan sa mga tigbalita sa pagkuha og habig ang maong kompaniya apan wala’y kadagkuan nga niatubang. (GMR) (BANAT NEWS)