CEBU, Philippines – Gipatuman dayun ni Talisay City Mayor Gerald Anthony “Samsam” Gullas Jr. ang “No Parking Policy” sa mga nasudnong karsada sa siyudad.
Kini isip pagsanong sa hangyo ni Presidente Rodrigo Duterte human iyang nakita nga ang pagpataka og parking sa karsada nakatampo sa kahuot sa trapiko.
Si Gullas nimando dayun ni Jonathan “Joy” Tumulak, traffic czar sa siyudad, sa pagsusi sa ordinansa labot sa no parking.
Si Tumalak nipahibawo nga aduna sila’y 30 ka clamp nga wala pa magamit.
Aduna’y multa nga P500 aron makuha ang clamp nga ibutang sa mga sakyanan nga pataka lang og parking.
Samtang gilusad kagahapon sa Land Transportation Office 7 ang “Kapihan sa LTO” diin gihisgutan ang mahitungod sa road safety aron malayo sa disgrasya sa kadalanan.
Matud ni Police Major Allan Rosario, pangulo sa Traffic Patrol Group sa Cebu City Police Office, nga moabot sa 750 ka traffic accidents ang natala matag buwan sa Cebu City lang diin 50 porsyento niini nga nalambigit mga motorsiklo.
Gihimug-atan ni Rosario nga aron malikayan ang disgrasya sa kadalanan, ang mga motorista angayan mo-obserbar og road courtesy ug motuman sa mga lagda sa trapiko.
Ang LTO-7 dunay gihimo aron mapatuman ang road safety ug mamenusan ang mga aksidente nga motumaw diin ang uban moresulta sa pagkakalas sa kinabuhi. (Decemay P. Padilla/GMR)(BANAT NEWS)