Mga proyekto alang sa edukasyon padayonon ni Chan
CEBU, Philippines – Si mayor-elect Jonard Ahong Chan sa Dakbayan sa Lapu-Lapu nipadayag nga tinguha niya ang pagpadayon sa mga proyekto nga naglambigit sa edukasyon aron mapalambo ang kahimtang sa mga tinun-an diha sa nagkadaiyang barangay.
Gipaniguro ni Chan nga mapadayon ang kaugmaran sa P70 milyones nga Arts and Design School Building nga mapahimuslan sa scholars sa dakbayan. Si Radaza nibutyag nga nahan-ay na ang maong proyekto ug ang hingpit nga pagpatuman na lang unta niini apan naabtan siya sa pagtapos sa iyang termino. Samtang si Chan nipadayag kini nga ang edukasyon maoy iyang top priority ug ang maong proyekto alang sa mga estudyante sa siyudad. Sa laing bahin, gitinguha ni Radaza ang dugang pa nga paghatag og kamahinungdanon ngadto sa mga Oponganon ang pag-ila sa makasaysayanong kinabuhi sa labing unang bayani nga si Datu Lapu-Lapu.
Gitinguha ni Radaza ang paghatag pa og dugang kasayoran labot sa gihimo nga pagpakigbisog alang sa pagbarog og pagpanalipod sa yutang natawhan niadtong panahon nga gisulong sa grupo ni Ferdinand Magellan ang Isla sa Mactan.
Gitataw ni Radaza nga sa iyang pag-asumer sa katungdanan isip kongresista sa Lone District sa Dakbayan sa Lapu-Lapu iyang tinguha ang pagduso og mga balaodnon nga nagtumong sa mga tulunghaan sa pagpang-apod-apod og mga libro sa lawak saringanan nga nag-asoy sa kinabuhi ni Lapu-Lapu. Dugang ni Radaza nga dako iyang pagtuo nga pinaagi sa iyang pagahimuon ang makasaysayanong kinabuhi ni Datu Lapu-Lapu masilsil usab sa alimpatakan sa mga tinun-an sa high school ug elementarya. (/BDB)(BANAT NEWS)
- Latest