16 police stations way kaugalingong luna

CEBU, Philippines — Plano sa kadagkuan sa Cebu Provincial Police Office nga mohangyo sa mga lokal nga kagamhanan nga hatagan na og luna ang 16 ka police stations nga squatter gihapon hangtud karon.

Ang direktor sa CPPO nga si Police Colonel Manuel Javier Abrugena nagkanayon nga nakadawat siya og mando gikan sa ilang labaw kabahin niini.

“I was given a directive to address the issue doon sa mga police na hanggang ngayon ay nakikitira sa municipal halls, and walang sariling lote,” sigun sa direktor.

Butyag ni Abrugena nga 450 square meters ang standard nga sukod sa yuta ang kinahanglanon alang sa estasyonan ug kinahanglang ideklarar kini nga donasyon sa lokal nga kagamhanan ngadto sa kapolisan.

Matud pa sa tigpamaba sa Police Regional Office-7 nga si Police Lieutenant Colonel Maria Aurora Rayos nga base sa ilang datos 32 porsyento o 16 sa 49 kabuok estasyonan sa polis ang gikonsiderar nga squatter sanglit gipanag-iya gihapon sa lokal nga kagamhanan ang luna sa ilang eatasyonan.

Bisan ang estasyonan sa mga component cities sama sa Dakbayan sa Danao, Dakbayan sa Naga ug Siyudad sa Carcar ang mga squatters gihapon. (BANAT NEWS)