CEBU, Philippines — Nahukman sa Commission on Elections (Comelec) nga diskwalipikado gyud ang kandidatura ni Konsehal Alvin Arcilla.
Ang Comelec En Banc nidason sa nahaunang desisyon sa Comelec
First Division nga nagkanselar sa kandidatura ni Arcilla niadtong Marso 19, 2019 pinaagi sa pagbasura sa motion for reconsideration nga gisang-at sa konsehal.
Ang desisyon nga gipetsahan og Mayo 28, 2019 gipirmahan ni nilang Comelec Chairman Sheriff Abas uban nilang Commissioners Al Parreño, Rowena Amelia Guanzon, Socorro Inting, Marlon Casquejo, Antonio Kho Jr. ug Luie Tito Guia.
Ang desisyon pinasubay sa balaud nga ang usa ka piniling opisyal moalagad lang sulod sa tulo ka sunod-sunod nga termino nga maoy nalatid sa Section 8 , Article X sa 1987 Constitution ug Section 43 (b) sa Republic Act No. 7160 o ang Local Government Code of 1991.
Si Arcilla niinsister nga naputol ang iyang termino dihang siya gisuspenso gikan sa Mayo 17, 2016 hangtud sa Hunyo 30, 2016 maong siya nagtuo nga makapapili gihapon siya alang sa laing termino niadtong Mayo 13 nga eleksiyon.
Usa ka Allen Canoy ang nisang-at og petisyon batok kang Arcilla sa pagpapili niini sa ikaupat ka higayon niadtong Mayo 13 nga eleksiyon tungod kay siya napili na sa samang posisyon isip konsehal sulod sa tulo ka sunod-sunod nga termino.
Matud ni Comelec Cebu City North District Election Officer, Atty. Chauncey Boholst, nga naghuwat sila sa kamanduan gikan sa En Banc aron pagproklamar sa sunod nga konsehal nga mohulip kang Arcilla nga si Konsehal Jerry Guardo.
Hinoon si Arcilla mahimo pa nga makadangop sa Korte Suprema aron pagpangayo og temporary restraining order (TRO). (GMR) (BANAT NEWS)