Hepe girelibohan tungod sa sakop nga Ninja cop

CEBU, Philippines — Hepe sa Labangon Police Sstation relibohan ug pasakaan og kasong administratiba tungod sa pagkasikop sa usa niya ka sakop niya nga gipasanginlang “Ninja Cop” human nadakpan atol sa buy bust operation niadtong Biyernes sa gabii.

Ang girelibohan nga hepe mao si Police Major Keith Andaya. Gipasabot sa direktor sa Cebu City Police Office nga si Police Colonel Royina Garma nga responsibilidad sa hepe ang pag-monitor sa iyang mga tao.

Nasayran nga nadakpan sa buy bust operation si Police Corporal Rogelio Atillo, membro sa Drug Enforcement Unit sa Labangon Police Station human natumbok nga nag-recycle kini og mga drugas nga masakmit gikan sa ilang dinakpan sa operasyon.

Base sa report, si Atillo positibong napalitan sa poseur buyer og 15 ka gramong shabu. Nasakmit sab gikan niya ang Glock 17 niini nga service firearm. Gibutyag ni Garma nga niadtong nasuta sa mga operatiba sa Pardo Police Station nga si Atillo maoy tinubdan sa shabu niadtong pusher nga ilang nadakpan sa buy bust operation, nagpahigayon dayon sila og case conference kauban si Andaya.

Bisan pa man og ni kooperar si Andaya, giingong aduna gihapon siyay pagkuwang isip hepe sanglit napakyas kini pagkasakop sa binuhatan sa iyang sakop.

Kini maoy hinungdan nga pasakaan sab si Andaya og kasong administratiba nga neglect of duty ug relibohan siya sa iyang pwesto epektibo karong Hulyo 15.

Si Garma miingon nga dako kaayo ang purohang mataktak sa serbisyo si Atillo ug mapriso.

 “Effective nung nahuli siya we requested na i-stop yung salary niya and R1 will be filing a forced leave as a course of action namin and immediately ‘yung admin case niya will commend so that he will be dismissed properly,” sigun pa ni Garma. Ang pagkasikop kang Atillo, kabahin sa internal cleansing nga gipangusgan ni PNP Chief Oscar Albayalde batok sa mga narco-cops ug ninja cops.

Ang narco-cop mao ang mga drug protectors samtang ang Ninja cops mao kadtong mga polis nga mang-recycle og drugas ug mangsabotahe aron lang ma-downgrade ang kaso sa dinakpan bugti sa suborno.  “Tao din naman yan eh, you cannot actually perfect the organization. There will always be ‘yung the rotten one talaga. It’s good na napaaga, as early as this na-intecept namin and na entrap namin siya kasi sabi niya (Atillo) second time pa daw niya ‘yung ginawa,” sigun sa maong direktor. (/IBM)(BANATNEWS)