CEBU, Philippines — Temporaryo usa nga ipasarado ang usa sa mga sikat nga busay sa Lungsod sa Samboan, ang Aguinid falls.
Sa Facebook post sa Aguinid Tangbo, gipahibalo ang temporaryong pagpasirado sa maong busay nga magsugod sa Hunyo 17 hangtud Hulyo 17 karong tuiga.
"It's time to let nature heals itself and for the barangay and guides to make some changes and reforms when it opens again to the public" matud sa maong Facebook post.
Dugang pa sa maong post ang pagbukas og balik sa maong falls inig Hulyo posibleng malugwayan depende kon kinahanglang himuon sa maong barangay.
Gikumpirmar usab kini ni Erwin Gamallo ang tourism officer sa lungsod ang maong temporaryong pagpasirado sa maong falls.
Ang Aguinid Falls, usa sa mga busay nga nahimutang sa Brgy. Tangbo, Samboan nga adunay dili momenus lima hangtud pito ka lebel sa waterfalls nga kinahanglan katkaton sa mga gustong mosuway sa water adventure.
Si Bise Gobernador Agnes Magpale kinsa maoy tsirman sa Provincial Tourism Commission nihangop ug nidayeg sa gihimong lakang sa LGU sa Samboan.
“I congratulate the local officials for the guts to do this and we will not wait for national government to look into our tourism destination unya masirhan na nuon ta" matud ni Magpale.
Giawhag usab niini ang ubang LGUs nga adunay mga tourist destination hilabina kadtong kanunay dagsaon og bisita nga sundon ang gihimo sa Samboan. (BANAT NEWS)