Dashcams ipanghatag na

CEBU, Philippines – Gilauman nga sunod semana, ipanghatag na sa Cebu City Transportation Office (CCTO) ang libreng dashboard cameras ngadto sa mga Public Utility Jeepney (PUJ) drivers.

Ang operations chief sa CCTO nga si Francisco Ouano miingon, ang ilang pangulo nga si Atty. Ismael Garaygay III nag-review na sa Memorandum of Agreement nga pirmahan tali sa mga PUJ operators ug kagamhanan sa Siyudad sa Sugbo.

Matud niini, gusto sa ilang buhatan nga masiguro ang legalidad sa pagpanghatag sa maong mga dashcams aron malikayan ang technical issues sa umaabot.

Midugang kini nga ang City Legal Office maoy mi-draft sa MOA diin nakalatid ang nagkalain-laing kondisyon alang sa safekeeping sa maong propeyidad.

Asoy ni Ouano, mahinungdanon nga i-dokumento ang paghatag og dashcams aron sa pag-establisar sa liabilities sa mga nalambigit niini.

Pipila sa importanteng feature sa kasabutan mao nga ang operator maoy manubag kon ang dashboard camera maguba o mawagtang ug ang mga drivers dili mahimong mobaligya sa maong kahimanan.

Kon mahuman na ang CCTO sa pag-review sa MOA, ilang i-distribute ang dashcams ngadto sa mga drivers sunod semana sa Cebu City Hall.

Niadtong Abril ang supplier mi-deliver sa mga dashcams nga anaa karon sa kostudiya sa Department of General Services.

Basi sa records, mga 600 ka mga drivers sa siyudad ang nakakuha og travel line certificate.

Ang pagkuha og travel line certificate lakip sa rekisitos nga gipagawas sa CCTO aron makapahimulos sa libreng dashboard cameras.

Laing rekisitos mao ang official receipt ug franchise gikan sa Land Transportation Franchising and Regulatory Board.

Apan si Ouano miingon nga ang dashboard cameras ma-avail sab sa mga drivers nga napakyas sa pagkuha og travel line certificate sa ilang buhatan basta ilang hipuson og tarong ang maong kahimanan.

Sa miaging tuig, sa fourth supplemental budget, ang Executive Department nitagana og P5 million alang sa procurement sa 1,000 ka dashboard cameras.

Nakadesisyon si outgoing Mayor Tomas Osmeña nga mopalit niini aron pagpugong sa kriminilidad ug pagpalambo sa kalinaw ug kahapsay sa siyudad. (/DILT)(BANAT NEWS)