Mga magtutudlo sa Mandaue nakadawat na sa honorarium
CEBU, Philippines — Gihangop sa mga magtutudlo sa Dakbayan sa Mandaue ang pagdawat sa ilang honorarium sa pagserbisyo nila sa niaging Mayo 13, 2019 midterm election.
Nagsugod ang pagpanghatag sa ilang honorarium niadtong Mayo 17 o upat ka adlaw ang nakalabay human sa piniliay pinaagi usab sa buhatan sa Commission on Elections (Comelec) sa Dakbayan sa Mandaue.
Gipadala sa ulohan nga buhatan sa Comelec ang P7.4 milyones nga budget nga gigahin alang sa 1,408 ka magtutudlo nga niserbisyo sa Dakbayan sa Mandaue sa niaging piniliay.
Ang maong honorarium nga nadawat sa mga magtutudlo gikuhaan kini og buhis sa kagamhanan sa siyudad.
Si Evelyn Cueva, assistant election officer sa Dakbayan sa Mandaue nagkanayon nga gi-schedule dayon nila ang pagpanghatag sa honorarium sa mga magtutudlo diin nagsugod kini niadtong Biyernes ug niadtong Sabado nagpadayon sila sa pagpanghatag ug gipadayon nila kini kagahapon.
Sa nasayran nga ang mga chairperson sa electoral board makadawat og P7,000 apan gikuhaan kini og buhis nga P350 diin P6,650 na lang ang ilang nadawat niini..
Ang poll clerk ug electoral board member P5,700 ug P2,850 ang nadawat sa mga support staff sa Comelec.
Ang mga magtutudlo nga wala makakuha sa ilang honorarium sa gihatag nga schedule mahimo kini nilang makuha sa Comelec Mandaue Office sa Mayo 22. (BANAT NEWS)
- Latest
