Dugang J.O. alang sa paglimpyo sa mga kanal ug sapa
CEBU, Philippines — Ang Chairman sa Committee on Infrastructure sa Konseho sa Siyudad sa Sugbo Konsehal Jerry Guardo nagplano nga mangayo og dugang 48 ka manpower alang sa “Menos Baha Task Force”, usa ka team nga gitahasan sa pagresponde sa request sa publiko sama sa declogging.
Si Konsehal Guardo miingon nga sukad nga ang maong programa napahibawo sa mga residente sa Cebu City, misaka ang demand gikan sa unom ngadto na sa napulo ka request matag adlaw.
Laing factor sa pagsaka sa request mao ang pagdayeg sa barangay sa declogging program sa drainage, sapa, ug kanal.
Nisugod og saka ang request gikan sa buwan sa Oktubre sa miaging tuig hangtud ning kasamtangan.
Nasayran nga ang task force gilangkuban sa upat ka teams nga adunay 60 ka job order workers nga ubos sa supervision sa Department of Engineering and Public Works.
Hinungdan nga nakita ni Guardo nga mang-hire og dugang tawo aron i-augment sa existing manpower sa programa.
Sigon sa Konsehal dili siya gusto nga adunay backlogs sa ilang operasyon aron ang implementasyon sa programa matarong.
Matud ni Guardo ang dugang manpower langkuban sa mga skilled workers sanglit moayo sab sila sa naguba nga mga drainage ug uban pa.
Ang binuwan nga sweldo sa dugang trabahante adto kuhaon sa account sa Cebu City Disaster Risk Reduction Management Office.
Hinuon, iduso pa kini sa Konsehal sa City Council alang sa approval human sa piniliay karong May 13.
Sa pagkutlo ning maong balita, ang ‘Menos Baha Task Force’ naka-responde na og 1,500 ka declogging request sa barangay ug concerned citizens. (/DILT)(BANATNEWS)
- Latest
