CEBU, Philippines – Duha ka tawo ang nabiktima sa pagpanulis sa mga tulisan nga nagsakay og motorsiklo niadtong Domingo sa kadlawon diha sa managlahing lugar sa Dakbayan sa Talisay.
Unang biktima mao si Jaslyn Lavapiz, 30-anyos, taga Barangay Lawaan 1 sa maong siyudad.
Si Lavapiz ang nag-atang og kasakyan nga habal-habal paingon kining motamhong sa iyang trabaho niadtong Domingo sa kadlawon.
Duha ka wala mailhing lalaki kinsa nagsakay og motorsiklo ang nihunong sa iyang atubangan dayon tion og armas ug nideklara og tulis. Nadala sa tulisan ang bag sa biktima nga adunay sulod nga mga cellphone nga nibalor tanan ngadto sa P24,500 ug kwarta nga P4,500.
Kagahapon sa kadlawon, nabiktima usab sa pagpanulis si Aldrin Montecillo, 30, taga Barangay Dumlog sa maong dakbayan. Matud ni Montecillo nga naghuwat siya og kasakyan paingon usab ngadto sa iyang trabahoan sa Siyudad sa Sugbo. Usa ka lalaki nga nagmaneho og motorsiklo ang nihunong sa iyang atubangan ug nanghagad nga ihatud siya niini.
Nisakay sa motorsiklo si Montecillo apan tungod kay walay helmet ang suspek nihangyo kini ngadto sa biktima nga kuhaon niya ang iyang helmet.
Ang biktima gihunong sa tulisan diha sa ngitngit nga lugar sa Carmen Village dayon deklara og tulis ngadto sa biktima.
Gumikan sa kahadlok sa biktima gihatag niini ang iyang bag nga adunay sulod nga mga cellphone, ID ingon man kwarta nga P1,500. (/BDB)(BANAT NEWS)