CEBU, Philippines — Gihulagway ni Vice Mayor Edgardo Labella nga “unfair” ang pamahayag ni Cebu City Mayor Tomas Osmeña batok sa kapolisan sa Siyudad sa Sugbo.
Ang maong reaksyon sa bise mayor subay sa paghatag sa mayor og napulo ka adlaw ngadto sa Cebu City Police Office sa pagsulbad sa nahitabong pagpangrakrak sa panimalay nila ni Sudlon II Barangay Captain Precillo Albores ug Sinsin Barangay Captain Aurello Laspuña.
Namahayag ang mayor nga kon dili masulbad sa kapolisan sulod sa napulo ka adlaw ang maong hitabo, ang kapolisan maoy iyang pasanginlan nga maoy nagpaluyo sa maong hitabo. “Let’s give them time and I think that is a very unfair statement nga sila’y i-accuse, you come up of some statement of that nature. Para nako dili na na-fair nga ingnon nimo nga just because they weren’t able to solve the crime with the time given of 10 days sila na nuon imong akusahon, that is unfair”, pamahayag ni Vice Mayor Labella.
Una nang giangkon ni Kapitan Albores nga hangtud karon gipangulbaan gihapon sila sa nahitabo sa pagpangrakrak sa ilang balay sa miaging semana.
Ang ilang mga barangay tanod halos wala nay tulog kay nag-roving sa ilang lugar aron masiguro nga dili na masubli pa ang hitabo. Nasayran sab nga aduna nay mga polis nga mag-roving na sab sa dapit.
Blangko pa gihapon ang kapitan kon kinsay nagpaluyo sa maong insidente maong nanawagan kini sa CCPO nga unta paspasan ang imbestigasyon nga ilang gihimo. (/DILT)(BANATNEWS)