Dugang ebidensya batok sa mayor giduso

CEBU, Philippines —  Ang Cebu City Police Office (CCPO) niduso og dugang ebidensya sa kaso nga ilang gipasaka batok kang Cebu City Mayor Tomas Osmeña sa buhatan sa Ombudsman-Visayas.

Niadtong Agosto sa miaging tuig, ang CCPO nipasaka og obstruction of justice, grave abuse of authority, misconduct, ug violation of  the ethical standards for government employees batok kang Osmeña tungod sa alegasyong gipabuhian niya ang tulo ka mga lalaking gidakop sa kapolisan tungod sa pag-operate og illegal refilling station nga gidili sa balaod. Kauban si Douglas Labra, ang opisyales sa CCPO niduso sa maong dugang ebidensya kagahapon diha sa Ombudsman-Visayas.

Si Labra, 57, nga taga Barangay Guadalupe, Cebu City, nagkanayon nga kaila siya ni Osmeña kay volunteer siya niini niadtong eleksyon sa 2013 ug 2016.

Kaabag sab siya sa mga programa ni Osmeña sa livelihood projects sa mga bukirang barangay sa dakbayan apan kalakip niini ang pag-supply og libreng butane canisters nga may pangalang “Type O” sa mga taga didto.

Niadtong Agosto 24, 2018, matud ni Labra nga iyang nabasahan sa newspaper nga gipabuhian ni Osmeña gikan sa detention cell sa Pari-an Police Station silang Ramir Amaca, 33, taga Mandaue City; Romeo Appareca, 42; ug Romeo Cuevas, 57; taga Cebu City. Ang tulo gidakop sa mga polis tungod sa pag-refill sa lata sa butane og LPG diha merkado sa Barangay T. Padilla.

Matud ni Labra, kaila siya ni Amaca kay business partner kini sa iyang mga in-laws sa pag-retail ug distribusyon og refilled butane canisters. Ug si Amaca, kustomer sa refilling business ni Osmeña.

Ang Banat News misuway pagkuha sa habig sa mayor apan wala pa kini motubag atol sa pagsuwat ning balita. IBM (BANATNEWS)