11 ka buwang bata patay sa tipdas; bakuna gikinahanglan

CEBU, Philippines – Usa ka 11 ka buwan nga batang babaye ang ulahing nakalas sa sakit nga tipdas nga natala sa Department of Health-7.

Ang bata nga taga Dakbayan sa Sugbo, namatay tungod sa komplikasyon sa tipdas nga mao ang multiple organ failure. Ang maong bata mao ang ika-siyam nga namatay tungod sa maong sakit. Ang DOH-7 nakatala na og 898 ka mga kumpirmadong nasakit og tipdas sa rehiyon karong tuiga, diin adunay daghan gihapon nga kaso ang Cebu City - 247, gisundan sa Lapu-Lapu City - 50 ug Talisay City - 34 ka mga kaso. Padayon gihapon ang pamakuna sa DOH matud pa ni Jane Michelle Raagas ngadto sa mga nagkadaiyang bahin sa rehiyon aron ilang makab-ot ang target nga 244, 091 basi sa ilang listahan.

Si Ruff Vincent Valdevieso, ang vaccination coordinator mitug-an nga ang World Health Organization mitabang na karon sa pag-update sa listahan diin anaa na kini karon sa 35 porsiyento sa ilang vaccination rate o 86,122 mil ka tawo ang anaa sa labing uwahing datus.

Nunot niini ang City Health Office sa Siyudad sa Talisay nanghinaut nga sila mahatagan og dugang bakuna batok tipdas human napanglantawan ni Dr. Lino Alanzado nga karon nalang semanaha kutob ang ilang suplay sa bakuna.

Matud niya nga ilang gisiguro sa paghatag og bakuna kadtong barangay nga bag-o lang nakit-an nga adunay kaso sa tipdas.

Niadtong miaging adlaw, usa ka 22-anyos nga lalaki ang ilang napamatud-ang nasakit og tipdas. Apan nagtuo si Alanzado nga nakuha sa biktima ang maong sakit sa laing lugar apan kay kini taga Talisay man, hinungdan nga ang mga silingan niini mao ang ilang gibakunahan batok tipdas.

Ang Talisay anaa na sa ikatulo nga adunay labing taas nga kaso sa maong sakit sa tibuok rehiyon. Nagpasalamat si Alanzado nga bisan pa man niini, walay natala nga namatay sa maong sakit. (Gabriel C. Bonjoc/DILT)(BANAT NEWS)