CEBU, Philippines – Lalaking gikan naghatud sa iyang anak sa tunghaan ang gipatay sa wa mailhing mga lalaki nga nagsakay og motorsiklo atubangan sa San Isidro Elementary School sa Barangay San Isidro, Dakbayan sa Talisay kagahapon sa buntag.
Ang biktima giila nga si Jason Narrido, taga Sitio Tiago, Barangay San Isidro sa nahisgutang siyudad. Matud pa sa tindera og fish ball sa maong lugar nga naghatud sa iyang anak nga lalaki ang biktima ug nihapit kini kay mipalit unta og gulaman.
Apan samtang nagtakos ang saksi sa gulaman kalit nga naabot ang duha ka mga lalaki nga nagsakay og motorsiklo. Ang angkas maoy ninaug ug giagbayan ang biktima ug nanglakaw sila palayo ug nadunggan dayon ang upat ka mga masipang buto sa armas.
Sumala pa sa saksi sa dihang giagbayan ang biktima sa gunman gipasidan-an siya daan sa nagmaneho sa motor nga mopadaplin kay basin og maigo. Human sa pagpamusil nisibat ang duha ka mga mamumuno.
Si PO3 Glenn Besande, imbestigador sa Talisay City Police Station miingon nga sa ulo ug sa lawas ang mga samad sa biktima nga nakaingon sa hinanali niining kamatayon.
Ang motorsiklo sa biktima nakit-an nga adunay sticker nga logo sa PNP hinungdan nga gisusi sa mga imbestigador ang background sa biktima. (/IBM)(BANAT NEWS)