CEBU, Philippines – Si Buhay Partylist Representative Lito Atienza malaumon nga dili mapasar ang medicinal marijuana sa Senado.
Kini ang tipik sa pamahayag ni Atienza atol sa pagbisita niini sa Dakbayan sa Sugbo tungod kay aduna kini gitambongan nga mga kalihukan.
Ang Kongreso nipasar sa House Bill 6517 kun “the Philippine Compassionate Medical Cannabis Act” nga nag-legalized sa paggamit isip medicinal sa marijuana sa nasud.
Si Atienza nagkanayon nga nagtuo siya nga mas daghan ang nagtutok sa Kongreso sa negosyo imbes sa serbisyo apan dako ang iyang pagtuo nga dili kini mapasar ngadto sa Senado.
Si Atienza nagkanayon nga dako iyang pagsalig kang Senador Tito Sotto tungod usab sa baruganan niini batok sa maong medicinal marijuana nga posibleng mahimo unya nga recreational marijuana sa higayong mapasar.
Malaumon usab si Atienza nga dili kini hatagan og bili ni Presidente Rodrigo Duterte ang maong balaod tungod kay salikwaot kini sa iyang kampaniya batok sa ginadili nga drugas.
Gitug-an ni Atienza nga wala’y pagtuon nga nagpamatuod nga makaayo ang maong marijuana sa mga sakit. (/BDB)(BANAT NEWS)