UK Travel advisory sa Southern Cebu gilibkas
CEBU, Philippines – Gilibkas na sa United Kingdom ang travel advisory niini batok sa Southern Cebu base sa updated nga advisory nga giluwat niini kagahapong adlawa.
Nagpabilin hinoon ang travel advisory niini sa western ug central Mindanao ug sa Sulu tungod sa hulga terrorismo ug engkwentro tali sa military ug mga armadong grupo. Ang UK ni issue og travel advisory sa mga molupyo niini human sa nahitabong pagpamomba sa Jolo, Sulu nga nikalas og dili momenus 20 ka tawo ug nakaangol og sobra 100.
Si Michale Dino, Presidential Assistant to the Visayas mapasalamaton sa pag libkas na sa maong advisory ug nisubli nga walay direkta nga hulga terorismo sa Southern Cebu ilabi na sa Badian ug Dalaguete nga naapil sa UK travel advisory nga naluwat niadtong Enero 27.
Matud ni Dino nga importante ang paglibkas sa travel advisory tungod kay maka “revive” kini sa industriya ug ekonomikanhong kalihokan sa habagatang bahin sa lalawigan.
Si Bise Gobernador Agnes Magpale nagpasalamat sa paglibkas apan iyang gitug-an nga bisan sa maong advisory wa gihapon maapektahi ang gidaghanon sa mga langyaw nga turistang nangabot.
“It is such a relief to all of us, because if one country will issue travel advisory other countries will follow,” matud ni Magpale.
Samtang si Dalaguete Mayor Ronald Alan Cesante nagkanayon nga ang paglibkas sa maong advisory nagpakita nga luwas ang habagatang Sugbo gikan sa terrorismo.
“Thank you for being aware that the Southern Cebu is safe for foreigners, safe for Filipinos, safe for travelers, safe for all of us,” matud ni Cesante. (/IBM)(BANAT NEWS)
- Latest
