Pagpamanhig sa mga Reluya partially solved–polis

CEBU, Philippines – Gikonsiderar sa Special Investigation Task Group-Reluya nga partially solved na ang kasong pagpamanhig sa magtiayong San Fernando Mayor Lakambini ug Ricardo Reluya, Jr., presidente sa Association of Barangay Council ug sa mga kauban niini.

Si Chief Superintendent Debold Sinas, direktor sa Police Regional Office (PRO)-7nagkanayon nga  karong adlawa ipresentar niya ang ilang kalamboan ngadto kang Chief PNP Oscar Albyalde ug andam sila sa  desisyon niini.

Kagahapon napupos ang gihatag nga duha ka semanang ultimatum ni Albayalde sa SITG-Reluya sa pagsulbad sa maong krimen.

Kahinumduman nga gibanhigan si Lakambini uban sa iyang bana ug upat ka staff diha sa Barangay Linao, Dakbayan sa Talisay niadtong Enero 22.

Naluwas sa maong pagpamanhig si Lakambini ug ang duha ka mga staff niini apan si Ricardo, drayber nila nga si Allan Bayot ug ang tourism officer nga si Ricky Monterona namatay sa maong insidente.

Kagahapon gipresentar sa SITG-Reluya nga gipangulohan ni Police Senior Superintendent Manuel Javier Abrugena ngadto sa mga sakop sa media ang  nahimong dagan sa ilang imbestigasyon sulod lang sa duha ka semana.

Gihinganlan ni Abrugena sila si Jerome Labitad ug Felix Labrador Abacajan, Jr. pulo taga Dakbayan sa Talisay nga mga primary suspect sa maong krimen.

Kini human giingong positibo silang giila sa naka-survive nga security escort ni Reluya.

Giingong sa giluwatan nga affidavit sa security escort si Labitad maoy nisuway og abli sa van nga ilang gisakyanan ug nisulti nga “gahi, di maabli”.

Giingong nisunod si Abacajan ug maoy nisuway og abli sa pultahan sa van dapit sa drayber ug nimando sa pagsulit nga “birahi pa!”.

Samtang si Sinas nagkanayon nga mamahimo na nilang pasakaan og kasong direct assault, multiple attempted homicide ug violation of gun ban si Labitad ug Abacajan.

Si Labitad adun kini warrant of arrest sa kasong paghupot og ilegal nga armas samtang si Abacajan adunay WOA kasong illegal possession of explosives, illegal possession of firearms ug attempted murder. (Rowena D. Capistrano/BDB)(BANAT NEWS)