Palomo gihinginlan ni Abellana

CEBU, Philippines — Gumikan sa pagdumili ni suspended Mambaling Barangay Captain Gines Abellana sa pagbiya sa katungdanan, si Acting Barangay Captain Anne Marie Vestil Palomo nangayo og tabang sa Cebu City Council.

Sa iyang suwat niadtong Enero 25, gipahibawo ni Palomo ang konseho nga nagpadayon sa iyang trabaho si Abellana taliwa sa suspension order.

Nasayran nga niadtong Enero 8, ang City Council Committee of three sa North District misuspenso kang Abellana sulod sa 24 ka buwan labot sa alegasyon sa wala pagrelease sa honoraria ni Palomo ug laing tulo ka barangay konsehal gikan niadtong Hulyo hangtod sa Disyembre 2018.

Nahitabo ang suspensiyon human si Palomo, Edwil Managbagang, Victoriano Laborte ug Neonita Cuestas misang-at og reklamong abuse of authority batok ni Abellana.

Gitug-an ni Palomo nga miapil kini sa ilang regular session ug gihinginlan siya sa suspendidong kapitan nga ibakante ang pagka acting barangay captain kay wala kuno kini moagi sa saktong proseso, pagpagawas og Barangay clearances ug certificate of indigence, nakigtagbo sa mga barangay workers, ug nagpadala og suwat sa bangko kun asa ideposito ang ilang pundo.

“In view of this, undersigned asked for an immediate action from this Honorable Sangguniang Panglungsod to implement its decision”, dugang niya.

Si Palomo miadto sa Office of the Ombudsman Visayas niadtong Huwebes diin nangayo siya og advice, apan giingnan siya nga i-copy furnish ang suwat sa ilang buhatan. Hinuon iya na kining nahimo.

Matud ni Palomo, buot siyang mopasaka og reklamong usurpation of authority batok kang Abellana aron matapos na ang isyu.

Kahinumduman nga mag tulo ka semana na nga gisuspenso si Abellana apan nagdumili sa pagkanaug.

“We are starting to gather all evidences, I think we already have enough. I will see what SP’s decision would be by Tuesday”, dugang ni Palomo.

Ugmang adlawa ang konseho gilauman nga mo-deliberate sa maong hisgutanan.

Si Abellana sa iyang bahin miingon nga walay bili ang gipanghimo ni Palomo. “Useless endeavor because my suspension and her oathtaking is already in the hands of DILG Manila”, ni Abellana pa. (BANAT NEWS)