Mga JO sa bokal wala na i-renew
CEBU, Philippines — Giangkon ni Gobernador Hilario Davide, III nga tuyo gyud nga wala na gi-renew ang 17 ka job order (JO) nga empleyado sa mga board member.
Ang gobernador nagkanayon nga “common sense” lang nga dili usab i-renew ang maong mga JO tungod kay posibleng wala kini magtrabaho alang sa Kapitolyo hilabina nga nagkaduol ang eleksiyon.
“Mosweldo ang Kapitolyo kining mga JO nila nga dili gani sympathetic will not be working for us but for them, to the other side. Sila mismo they know this fact”, matud ni Davide. Matud ni Davide nga iyang prerogative kon angay ba i-renew ang mga JO hilabina nga ang pundo nga isweldo alang sa mga JO gikan sa buhatan sa gobernador.
Nunot niini, giangkon usab ni Davide nga nasagmuyo siya nga pipila sa mga bokal ang kalit lang nausab ang huna-huna kalabot sa plano sa Kapitolyo pagtukod sa 20-storey resource center.
Sa niaging tuig, wala pa hingpit nga napasar ang paghatag og pagtugot kang Davide nga mosulod og kontrata tali sa kontraktor sa pagtukod sa edipisyo sulod sa Capitol compound kini human nga walo ka bokal ang nibotar pagpabor sa maong proyekto, unom ang nisupak ug tulo ang ni abstain.
Nisuway sa pagpahigayon og special session ang provincial board sa wala pa kini mag-recess apan wala motungha ang ubang board members. (BANAT NEWS)
- Latest
