Mga polis girelibohan

CEBU, Philippines — Duha ka mga police stations sa Probinsya sa Sugbo ang girelibohan ang tanang polis apil na ang ilang mga hepe kagahapong adlawa ug silang tanan ipaubos sa moral recovery program sulod sa usa ka buwan tungod sa dili maayong labok sumala pa sa opisyal sa Police Regional Office-7.

Si Police Regional Office-7 nga si Chief Supt. Debold Sinas nagkanayon nga bati ang performance sa maong mga polis hinungdan nga ila kining girelibohan tanan.

Giingong sa tibuok tuig sa 2018, aduna ray 11 ka operasyon kontra drugas ang Daanbantayan Police Station ug wala sab sila manimaho sa kampanya kontra ilegal nga sugal diha sa ilang lungsod.

"Dili ko motuo nga walay drugs ug walay illegal gambling diri," sigun ni Sinas ngadto sa mga girelibohang mga polis.

Butyag ni Sinas ngadto sa mga membro sa media nga nakadawat sila og mga intelligence reports nga adunay higayon nga dili na manakop ang mga polis nga taga didto sanglit kaila ra nila ang mga badlungon. Giangkon niya nga intelligence reports ra ilang nadawat ug wala silay ebidensya aron mapasakaan og kasong administratiba ang maong mga polis. Sa 22 ka mga polis lakip na sa hepe niini nga si Police Senior Inspector Adrian Nalua, walo niini giingong taga Daanbantayan.

Gipangdis-armahan ni Sinas ang 21 ka mga polis ug gitagalan og tulo ka adlaw para i-settle sa ilang tanang obligasyon sa maong opisina.

Ang mga girelibohan padiretsuhon sa kampo sa RMFB didto sa lungsod sa Sibonga ang sa training  ug idestino sila sa laing lugar.

Ang hepe sa Cebu Provincial Police Office nga si Police Senior Supt. Manuel Javier Abrugena nakadesisyon nga ipabilin ang mga armas sa maong mga girelibohan aron adunay magamit ang mipuli nga pwersa.Si Nalua nagkanayon nga nakurat siya nga relibohan silang tanan diha-diha apan gidawat niya nga normal ra sa kapolisan ang mabalhin-balhin og assignment.

Giangkon ni Nalua nga naglisud gyud sila sa ilang operasyon kontra drugas sanglit dili sila suportado sa komunidad.

Gipulihan si Nalua ni Police Chief Inspector William Homoc, kanhi hepe sa San Remegio Police Station. Sa Oslob Police Station ang sunod nga assignment ni Nalua. Si Homoc sa iyang bahin nagkanayon nga dakong hagit kanila ang operasyon kontra drugas ilabi na nga dili mokooperar ang mga residente sa Daanbantayan.

Wala gipa-courtesy call ni Sinas si Homoc ngadto kang Daanbantayan Mayor Vicente Loot sanglit gilangkatan na sa iyang police powers ang maong mayor.

Kagahapon sa hapon, sunod girelibohan ang pwersa sa San Fernando Police Station apil ang hepe nga si Chief Inspector Arvi Arbuis.

Matud ni Sinas nga relax ra kaayo ang mga polis sa maong lungsod bisan nanggimok balik ang mga gaway sa drug lord nga si Franz Sabalones.

Ang 22 ka polis lakip sa ilang hepe nga si Senior Inspector Arvi Arbuis, gihulipan sa 32 ka polis nga pangulohan ni Chief Inspector Lymel Pasquin.

Si Arbuis miangkon nga na- demoralize apan anam-anam nilang nadawat ang maong mando. Si San Fernando Mayor Lakambini Reluya mapasalamaton sa pagdugang og mga pwersa sa ilang lungsod bisan og girelibohan ang tibuok pwersa sa ilang kapolisan.

Ang San Fernando ug Daanbantayan police stations mao ang ikaduha ug ikatulong estasyonan nga giilisan ang tanang polis ubos kang Sinas human sa Talisay Police Station niadtong Septiyembre 2, 2018.

Ang mga girelibohang mga polis sa San Fernando ug ang mga mirelibo gipaubos sab sa drug test. Mibahad si Sinas nga aduna pay mosunod nga police stations tungod kay nagmika sila sa ilang trabaho. (/IBM)(BANATNEWS)