CEBU, Philippines — Gitinguha sa buhatan sa Traffic Enforcement Agency of Mandaue (TEAM) ang pagpadagan og mga sakyanan aron unya maoy mohakot sa matanggong nga mga deboto subay sa kapistahan ni Señor Sto. Niño karong Enero 20. Ang pangulo sa TEAM nga si Glenn Antigua miingon nga iyang pangayuon ang pagtugot ni Mayor Luigi Quisumbing sa maong tinguha.
Dugang niya nga ilang himuon nga atol unya sa maong adlaw ilang pa-istambayon ang ilang sakyanan kon ilang masayran nga daghan ang matanggong nga pasahero sa ilang pagpamauli.
Gitataw ni Antigua nga gihimo na nila ang maong lakang niadtong miaging Disyembre diin ang mga natanggong nga pasahero ilang hakuton paingon ngadto sa ilang destinasyon. Kini midugang nga ang mga TEAM personnel mohimo og mga paglibot sa mga dapit nga mahimutangan sa pasahero sama sa national highways diin daghang magpaabot og kasakyan sa ilang pagpamauli ngadto sa silingang lungsod sa Consolacion.
“Kanang mga pasaheroa atong ihatod kutob lang sa SM Consolacion kay gikan didto daghan na man na og jeep nga ilang masakyan”, dugang pamahayag ni Antigua. DILT (BANAT NEWS)