CEBU, Philippines — Giawhag ang mga local government unit sa matag-lungsod nga magmatngon karong panahon sa ting-ulan.
Si Julius Regner, tigpamaba sa Provincial Disaster Risk Reduction and Management Office (PDRRMO) nibutyag nga niadtong Biyernes gi-activate ang tanang lokal nga disaster risk reduction and management office sa kalungsuran.
Sukad sa activation giingong ang Lungsod sa Dalaguete pa ang nagpahigayon og preemptive evacuation.
Natala nga adunay 40 ka pamilya ang nibakwit gikan sa Barangay Dumalan ngadto sa high school building diha sa kasikbit nga barangay.
Ang evacuation gipatuman tungod kay ang lugar nga gipuy-an sa mga residente gi-identify isip usa ka landslide-prone area.
Nahitabo ang pagbakwit niadtong Enero 4 human nipagawas og orange rainfall advisory ang National Disaster Risk Reduction and Management Council (NDRRMC).
Sa niaging duha ka bulan, adunay natala nga pagdahili sa yuta sa Barangay Mantalongon sa nahisgutang lungsod.
Ug tungod niini dili maagian og sakyanan ang dalan padulong sa Barangay Lugsangan niadtong buwan sa Nobiyembre sa niaging tuig apan nahawanan ra kini sa lokal nga kagamhanan sulod sa duha ka adlaw.
Gawas sa Dalaguete, aduna pay ubang lungsod ug dakbayan nga gihinganlan sa pangulo sa PDRRMO Baltazar Tribunalo nga delikado sa pagbaha o pagdahili sa yuta.
Sa habagatang bahin sa Sugbo, ang Argao, Malabuyoc, Sibonga, Carcar City, ug San Fernando apil usab ang mga lugar dapit sa Mananga River sa Dakbayan sa Talisay ug Mandaue.
Ang Dakbayan sa Danao ug Lungsod sa Carmen delikado usab sa pagbaha ug pagdahili sa yuta lakip ang Lungsod sa Pinamungajan ug Tuburan tungod kay daghang sapa ang maong mga dapit. (/BDB)(BANATNEWS)