CEBU, Philippines — Gipasakaan og kaso nga attempted murder ang usa ka tawo nga nanaygon nga nagdala og kalibre .22 nga revolver ug giingong namusil ngadto sa ilang mga silingan kinsa iyang nakabangi sulod na sa duha ka tuig dihang ilaha kining nasugatan.
Ang maong insidente nahitabo niadtong Lunes sa gabii diha sa Barangay Agsawanon, Lungsod sa Catmon. Si Police Officer 3 Vergel Ortiz sa Catmon Police Station miila sa suspetsado nga si Verjen Juban, hingkod ang panuigon, nagpuyo sa maong dapit.
Matud ni Ortiz nga kuyog sa suspetsado ang lain pa nilang silingan sa pagpanaygon apan dihang ilang nasugatan ang kontra niini nibalik kini sa iyang agi dayon ibot sa giluklok nga armas ug gipusil niini si Armando Genita, 39-anyos ug Jeffrey Sarcos, 24, mga residente usab sa maong dapit.
Ang mga biktima parehong natapsingan sa mga bala ug nakahigayon sa pagdasmag ngadto sa suspetsado ug gitabangan nila kini sa paglayog hangtud nga nailog nila ang armas niini.
Gawas sa pusil nailog usab sa mga biktima gikan sa suspetsado ang gidala niini kutsilyo.
Dugang ni Ortiz nga ang mga biktima ug ang suspetsado adunay dugay na nga panagbikil ug gani nagkaatubang na kini sulod sa pipila ka mga higayon alang sa paghusay sa ilang panagbikil diha sa ilang barangay kapitan.
Ang suspetsado kinsa nagtingkagol sa detention cell sa Catmon Police Station ang gipasakaan sa nahisgutang kaso. (/BDB)(BANATNEWS)