CEBU, Philippines — Mga konsehal sa Dakbayan sa Sugbo nga sakop sa oposisyon ang nisuporta sa plano nga magpahigayon og public bidding alang sa pagbaligya sa tulo ka ektaryang luna diha sa South Road Properties.
Si Konsehal Joel Garganera ug Raymond Alvin Garcia nagkanayon nga mas klaro ang public bidding itandi sa unsolicited proposal ug advantageous kini tungod kay ang taas og presyo maoy makapalit sa luna.
Matud ni Garcia nga dugay nang gihatagan og pagtugot sa konseho si Mayor Tomas Osmeña sa pagbaligya sa luna niadtong tuig 2016.
Ang Konseho nipalabang og ordinansa nga nagtugot ni Osmeña nga ibaligya ang luna sa siyudad sa presyo nga P110,000 matag metro kwadrado.
Sayo pa ang Federal Land nisumiter og unsolicited proposal niadtong buwan sa Abril karong tuiga nga paliton nila ang luna sa kantidad nga P115,000 matag metro kwadrado.
Apan si Francisco Fernandez, executive assistant sa mayor nagkanayon nga wala gihapon makadawat ang siyudad og tubag gikan sa Commission on Audit (COA).
Ang siyudad nipadala kini og suwat ngadto sa COA kalabot sa maong unsolicited proposal.
Matud ni Fernandez nga nagpatabang usab ang siyudad sa pag-review ug sa value sa yuta sa pagbaligya niini.
Si Osmeña nisaway sa COA sa giingong dugay nga pag-aksiyon niini sa request sa siyudad. (/BDB)(BANATNEWS)