CEBU, Philippines – Kritikal ang kahimtang sa 29-anyos nga lalaki human giunay og pusil sa iyang ig-agaw nga naputong sa iyang bugal-bugal sa may Sitio Quarry, Barangay Looc, Dakbayan sa Danao niadtong Lunes sa hapon.
Giila sa kapolisan sa Danao ang biktima nga si Ariel Gonzaga, residente sa dapit. Samtang ang suspek mao si Ryan Gonzaga, 37-anyos.
Sumala pa ni SPO2 Rene Camardo nga nagtakin og armas si Ryan dihang gi-komedyahan siya ni Ariel.
Giingong daghang silingan ang nakakita sa hitabo. Diin gidul-it matud pa sa suspek ang armas ngadto sa tangkugo sa iyang ig-agaw dihang gipabuto kini.
Misibat usab dayon si Ryan human mamusil ug gituohang dala pa niini ang armas.
Gikan sa tambalanan sa Danao, gi-refer sa tambalanan sa Dakbayan sa Sugbo ang biktima kay kritikal ang kahimtang niini. - /DILT (BANAT NEWS)