CEBU, Philippines — Dili mominus P5.5 milyones nga kantidad sa veterinary equipment ang giapod-apod sa Probinsiya sa Sugbo ngadto sa nagkadaiyang lungsod ug dakbayan.
Ang maong mga ekipo gihatag pinaagi sa Provincial Veterinary Office (PVO) nga gipangulohan ni Dr. Mary Rose Vincoy.
Apil sa giapod-apod mao ang viscera inspection tables, hanging scales, liquefied nitrogen-filled baby tanks, insemination equipment, vaccine refrigerator, slatted dehairing table, stainless hog gambrels, stainless steel hook ug digital weighing scale.
Ang mga mayor ug ubang representante sa mga lokal nga kagamhanan maoy nidawat sa maong mga ekipo niadtong Miyerkules sama ni Alegria Mayor Verna Magallon kinsa nagpasalamat sa ekipo nga nadawat.
Nitambong sa seremonya sa pag-apod-apod sa maong ekipo mao sila si Bokal Christopher Baricuatro ug Yolanda Daan uban usab sa pangulo sa Provincial General Services Officer nga si Jone Sepe.
Atol sa maong kalihukan si Vincoy nipahibalo nga ang sunod nila ihatag mao ang mga slaughter house. (BANAT NEWS)