Nagnegosyo og pabuto kinahanglang may permit

CEBU, Philippines – Mga mamuhatay og mga pabuto diha sa Barangay Babag, sa Dakbayan sa Lapu-Lapu gipasidan-an nga kinahanglang motuman sila sa mga lagda mahitungod sa luwas nga pagpanghimo ug pagbaligya niini aron dili masubli kadtong mga aksidente sa nanglabay nga mga panahon diin adunay mga nakalas ug kabtangan nga nangaugdaw.

Subling gideklarar ang maong barangay nga firecracker zone area ug estriktuhon na kadtong magpataka og panigarilyo ug pagdaob og mga basura.

Matud  pa ni Mayor Paz  Radaza kinahanglan nga kompletuhon nila ang pagkuha sa mga gikinahanglan nga rekisitos ayha pa sila hatagan og permit sa siyudad kadtong wala niini dili mahimong makabaligya og pabuto ug kun masakpan makasohan sila ug kompiskahon ang ilang mga baligya.

Ang mga gustong maghimo o mamaligya niini kinahanglang mokuha og endorsement gikan sa barangay. Ang barangay na usab ang moduso niini ngadto sa PNP ug Bureau of   Fire and Protection (BFP).

Sa dili pa sila hatagan og permit, maghimo una og inspeksyon ang BFP ug kapolisan diha sa ilang pwesto aron tan-awon kun gikompleto nila ang mga rekisitos ilabi na ang mga gamit alang sa kaluwasan. (/IBM)(BANAT NEWS)