CEBU, Philippines — Gilauman sa kapolisan sa Lungsod sa Badian nga modagsa na usab ang mga turista diha sa ilang lugar sa sunod buwan.
Kini maoy gitug-an ni Inspector Elmond John Mondaya, hepe sa Badian Police Station.
Gipasabot ni Mondaya nga panahon sa mga buwan nga daghang bakasyon anha maghan-ok sa mga suroyanan nga lugar ang mga estudyante o mga empleyado.
Makit-an diha sa Lungsod sa Badian ang naila na nga Kawasan Falls, Lambog beach ug ang canyoonering.
Giklaro ni Mondaya nga sa maong panahon plastada na usab ang iyang mga sakop aron sa paghatag og kahapsay ug kalinaw sa lugar.
Gipahimangnoan ni Mondaya ang mga lumulupyo sa lugar nga tarungon sa pagtratar ang mga turista aron ganahan kini nga magbalik-balik.
“Police visibility ug ang nindot nga relasyon sa mga tawo sa lugar mao gyud ang among gihimug-atan aron kon naay panghitabo nga dili kalikayan dali lang namo masulbad”, matud ni Mondaya.
Si Mondaya nihangyo usab sa mga turista nga kon musuroy diha sa lugar motuman sa mga lagda aron dili mahasol sa ilang pagbakasyon. (/BDB)(BANATNEWS)