PRO-7 suportado sa PNP, DILG atol sa inquiry
CEBU, Philippines — Gipasaligan ang Police Regional Office 7 sa suporta ni Philippine National Police (PNP) Chief Oscar Albayalde ug sa Department of Interior and Local Government sa umaabot nga Senate inquiry kabahin sa mga kaso sa pagpatay sa rehiyon nunot sa kampanya kontra droga.
“Automatic na ang suporta ni Chief PNP, in fact pati nga si DILG,” matud ni Chief Supt. Debold Sinas, direktor sa PRO-7.
Niadtong Martes niabot si Albayalde sa Sugbo aron motambong sa pribadong meeting tali ni Presidente Rodrigo Duterte.
Gibutyag ni Sinas nga gimanduan sila nga siguraduhon nga kompleto na ang ilang mga kinahanglanon alang sa posibleng Senate inquiry.
“If the Senate needs the data, we will give them the data,” niingon si Sinas.
Padayag ni Sinas nga nahadlok siya nga sakyan sa mga politiko ang maong isyu ilabi na nga nagdulong na ang piniliay.
Nasayran nga buot sa oposisyon nga ipaubos og Senate inquiry ang maong isyu human giingong naalarma sila niini.
Si Senator Grace Poe niduso na og resolusyon sa pag-awhag sa Senate Committee on Public Order and Dangerous Drugs nga mopahigayon sa maong inquiry. -/GMR (BANATNEWS)
- Latest
