CEBU, Philippines – Ang direktor sa Police Regional Office (PRO)-7 Chief Superintendent Debold Sinas niluwat og direktiba nga isiguro ang basic security package sa polis kon mag-escort ug moadto sa mga hilit nga dapit sakay ang police marked vehicles.
Kini aron sa paglikay nga dili sila madaog sa possibleng mo-atake kanila.
Ang tigpamaba sa PRO-7, Police Superintendent Reyman Tolentin nibutyag nga ang maong direktiba giluwat ni Sinas human nga nakalas ang tulo ka polis nga ni-escort sa director general sa Food and Drug Administration (FDA) nga si Nela Charade Galang-Puno didto sa Lupi, Camarines Sur.
Sakay ang maong mga biktima sa PNP marked vehicle ug gibanhigan sa kapin 20 ka wala pa mailhing mga armadong lalaki.
Matud ni Tolentin nga kinahanglang kapin sa upat ka polis ang mosakay niini aron malikayan nga ma-harrass ug ma ambush ang kapolisan ug makabawos o makasukol kini kong ugaling adunay pagpangatake nga mahitabo.
Giklaro ni Tolentin nga ang maong direktiba pagpangandam lang kini ug wala nagpasabot nga mahitabo gyud sa rehiyon siyete ang samang hitabo ngadto sa Camarines Sur.
Dugang ni Tolentin nga aktibo ang Provincial Mobile Force Company ug ang PNP Special Action Force nga nagpatrolya sa rehiyon ilabi na sa mga bukirang barangay. -/BDB (BANAT NEWS)