CEBU, Philippines — Hingpit nang gihunong kagahapon sa ika-17 ka adlaw ang search and retrieval operations sa Sitio Sindulan, Barangay Tinaan, Dakbayan sa Naga tungod sa peligrong nagpaabot sa mga rescuers ug responders nga nangubkob didto.
Si Mayor Kristine Vanessa Chiong miingon nga rekomendasyon sa incident commander nga ipahunong na kay dili na luwas ang ground zero tungod sa pagsige og ulan.
Nasuta sa Mines and Geo Sciences Bureau nga dili na luwas kon ipadayon ang maong operasyon sumala pa ni Baltazar Tribunalo Jr., ang pangulo sa Provincial Disaster Risk Reduction and Management Office (PDRRMO).
"Nakuha naman ang mga walls (mga dagkong bato sa ibabaw), of course murag niluag na pud sa ibabaw, in other words sa gihimo nato nga retrieval naka-endanger sa atong mga responders, sa mga equipment and sa mga tagtungod," matud ni Tribunalo sa Banat News.
Matud ni Chiong gipasabot na usab ang mga pamilya sa mga na-missing sa rason sa paghunong sa pagpangita.
Apan magpadayon ang pagkuha sa mga debris ug kon may makitang lawas o parte sa tawo dad-on kini sa munisipyo aron ilhon.
Dugang pa ni Chiong nga magpabilin ang kapulisan ug militar sa lugar aron way makabalik og puyo didto kay wala pay report sa MGB bahin sa lugar.
Mapasalamaton ang mayor sa tanang mga miresponde ug mitabang sa mga survivors. Niadto pa untang Miyerkules hunongon ang retrieval operation apan matod ni Tribunalo gilugwayan nila kini tungod sa hangyo sa mga tagtungod.
Samtang si Archbishop Jose Palma sa Archdiocese of Cebu mapasalamaton sa gipakitang pagtinabangay sa tanan human sa maong katalagman ug giawhag ang mga namatyan nga magpabiling lig-on ug di mawad-an og pagsalig sa Ginoo.
Usa ka Santos nga Misa pinangulohan ni Fr. Mario Atienza ang gihimo kagahapon nga gisundan og prosisyon sa mga Imahen sa Senyor Sto. Niño ug ni Saint Francis de Assisi padung sa “ground zero” diin nitarok ang mga tawo og mga kandila ug nagpalupad og mga puti nga lobo. Human niini gilubong ang nahibiling 31 ka mga patay nga lawas ug mga parte sa lawas nga mao nalay nakit-an.
Sa kinatibuk-an moabot 78 ang nakalas, 18 ang naangol ug lima pa ang missing samtang 1, 667 ka pamilya ang gipabakwit tungod sa peligro. (Le Phyllis F. Antojado/IBM)(BANATNEWS)