Gihikawan ilang pamilya

CEBU, Philippines – Dako kaayo ang pagbangutan sa pamilya ni Christopher Tangag, usa ka call center agent nga nag-sideline pagpamasahero og habal-habal nga giapil sa gituohang summary killing sa Barangay Malubog, Cebu City.

Si Tangag usa pa lang ka semana nga namasahero aron idugang sa iyang kita para sa iyang pamilya pangbayad sa parking fee didto sa iyang trabahoan.

Ang ginikanan ni Tangag nga nakahinabi sa Banat News miingon nga sakit kaayo sa ilang dughan nga ang ilang anak nga nangyawat aron mokita para sa pamilya gipatay sa mga tawong wala gani makasuhito sa pagkatawo sa ilang anak.

Si Christopher usa pa lang ka tuig gikan naminyo ug may usa ka anak nga lalaking siyam pa ka bulan.

Matud pa sa amahan nga buotan, hilomon, walay libog, palaamigo, maayo sa klase ug iskolar ang anak pagtungha sa kolehiyo ug wala kini sukad malambigit og krimen ug ilegal nga drugas. Sakit para kanila nga yano rang gipatay ilang anak.

Makaluluoy ug ilang panalipdan ang anak gikan sa pagtamay sa mga tawong namasangil ug nihukom sa pagkatawo niini ilabi nga karon dili na kini makapanalipod sa kaugalingon.

Si Tangag naapil sa lima ka mga lalaking gi-pickup sa mga kalalakin-an ug gidala sa Ayala Heights sa Malubog ug didto gipamusil. Giingong adunay mga armas ug ilegal nga drugas ug ang ilang motorsiklo nga nakuha sa crime scene.

Nianang gabhiuna nabalaka silang wala makauli ang anak ug pagkabuntag nasayran nila sa social media gipatay kini.

Ang pamilya ni Tangag nakaingon nga gihikawan og kaugmaon ang ilang anak, asawa niini ug ilang apo.  Matud nila wala sila mahadlok kay wala sila malambigit sa ilegal nga kalihukan.

Very alarming maoy paghulagway ni Cebu Archbishop Jose Palma sa sunod-sunod nga patay sa Sugbo bisan pa sa Oratio Imperata nga gihimo sa simbahan.

Matud pa ni Palma, subo kaayo pamalandungon ang Cebu nga Cradle of Christianity sa Asya naingon niini.

Giawhag niya ang katawhan nga doblehon ug pahugtan pa ang pag-ampo nga kuhiton sa konsensiya ug mobati sa gibati sa mga pamilya sa ilang mga biktima ang mga naghimo niini.

Nipahinumdom siya sa mga mamumuno nga dili sila maoy hukom ug mosilot sa tawo kay dunay balaod ug may proseso nga kinahanglang sundon.

Gipadayag ni Palma nga hugot ang simbahan sa suporta sa kampanya batok sa ilegal nga drugas apan sayop ang paglaktod sa balaod. (/IBM)(BANAT NEWS)