CEBU, Philippines — Gitunol na sa kagamhanan sa Siyudad sa Sugbo ang hinabang nga ilang natigum gikan sa cash donations hangtud na sa mga relief goods ngadto sa Siyudad sa Naga.
Ang pangulo sa Cebu City Disaster Risk Reduction and Management Office, Nagiel Bañacia, niingon nga uban niya ang mga department heads sa pag-adto sa Siyudad sa Naga aron i-turn over ang relief goods ug cash donations nga nakolekta.
Ang mga kawani sa Cebu City Hall nag-amot-amot diin nakatigum sila og P52,066 ug laing P32,447 gikan sa mga cash donations sa mga residente sa Siyudad sa Sugbo.
Samtang sila si Konsehal Raymond Alvin Garcia ug Renato “Junjun” Osmeña uban ang Korean firms nitunol sab og P1 million nga kantidad sa relief goods sa Naga.
Sila si Bruce Kim sa J.B Armor Wholesale Corp., iyang igsuon nga si Bryan Kim sa NewLink Corp. ug higala nga si Jason Chu sa Log Blue Dive Shop, nagkasinabot nga mohatag og donasyon human ila sab gibati ang kaguol sa nahitabo sa Dakbayan sa Naga.
Samtang si Naga City Mayor Kristine Vanessa Chiong mapasalamaton sa tabang nga gihatag sa kagamhanan sa siyudad. Gipahibawo sab niini nga ang staff ni Mayor Tomas Osmeña nibisita sa iya ug nangutana kun unsay gikinahanglan nila ug si Mayor Chiong nibutyag nga nagkinahanglan sila og daycare center diin ni-commit ang Siyudad sa Sugbo niini. (BANAT NEWS)