CEBU, Philippines — Pito ka tawo ang naangol sa nahitabong sungag sa tulo ka sakyanan kagahapon sa buntag diha sa Mantawi Drive, Barangay Subangdaku, Dakbayan sa Mandaue. Ang mga sakyanan nga nagsungag gilangkuban sa L300 van nga company car sa RNCC Engineering Works, Fuso Gullwing sa Profood International Corporation ug Isuzu prime mover sa Call N Haul Service Corp.
Ang mga naangol mao sila si Alfie B. Carbonilla, 20-anyos, estudyante sa kolehiyo, taga Hernan Cortes St., Barangay Tipolo, sa maong siyudad, Elmer Himaya, 51 years old, minyo usa ka engineer diha ug Maria Hazel L. Tibon, 41-anyos, residente sa Cambiohan Casili, Consolacion, ug sakay sa L300 van ug gimaneho Dario Capangpangan Pepito, 39, residente sa Catarman, Lungsod sa Liloan kinsa naangol usab.
Samtang sa Fuso Gullwing naangol sila si Genard Enar Pintor, 47, taga Barangay Maguikay, Mandaue ug ang sakay niini nga si Rogelio Quiling Yurag, 28, taga Barangay Tejero, Dakbayan sa Sugbo ug Allan Abong Marangga, 46, ulitawo drayber sa Isuzu prime mover, taga, Subangdaku.
Base sa imbestigasyon sa Mandaue City Traffic Office nga ang L300 van ug ang Fuso Gullwing parehong kusog ang dagan ug nagkaabot diha sa intersection sa nahisgutang lugar ug naabtan sa Isuzu prime mover. (/BDB)(BANATNEWS)