CEBU, Philippines – Mabulokon ang ika-30 ka tuig nga sumad sa kamatayon ni Archbishop Teofilo Camomot kagahapon human gipahigayon usab ang groundbreaking sa katukuran sa kapilya ni Sta. Teresa de Avila human sa Santos nga Misa nga gipangulohan ni Archbishop Jose Palma uban sa mga kaparian sa Archdiocese of Cebu.
Ang Arsobispo, mapasalamaton sa tanang mga tawo nga nitambong diin ang uban gikan pa sa lain-lain lugar sa Pilipinas.
Dugang pa sa arsobispo, sa pagka karon padayon pa ang proseso alang sa canonization ni Camomot ug malaumon siya nga sa umaabot nga adlaw mabayaw na kini sa kadungganan sa altar.
Adunay mga report, nga dako kaayo ang tsansa nga madeklarar nga usa ka santo si Camomot gumikan kay nakapasar kini sa mga rekisitos ilabi na sa mga milagro pinaagi sa pag-ampo pagpatabang kaniya nga mahatag ang ilang gipangayong kaayohan sa balatian.
Sumala pa ni Palma pinaagi niining gitukod nga mas dakodakong kapilya mas daghang tawo nga buot moyukbo ni Camomot ang makasulod. Matud pa 1,500 ka tawo ang makasulod niini ug dako ang pasalamat ni Palma sa mga nitabang sa pagpatukod niini.
Samtang si Architect Arnold Saballa, nibutyag nga usa ka tuig ang mahuman ang maong kapilya.
Sila si Palma, Rev. Mo. Ma. Louella Grace Buscato, DST Mother Superior ug Chairman sa The Freeman / Banat News Jose ‘Dodong’ Gullas uban sa iyang kapikas nga si Nena Gullas ug ilang anak wala magdahom nga karong mahinayon gyud ang ground breaking sa katukoran sa maong kapilya.
Sumala pa ni Gullas, maoy iyang pangandoy kuyog sa iyang pamilya nga makatampo bisan og gamay sa katukuran sa balay alampoanan.
Giawhag niya ang tanan sa pag-ampo nga mahuman dayon ang kapilya ug pag-ampo usab alang sa paspas nga pagbayaw kang Camomot ngadto sa pagka usa ka Santos. (/IBM)(BANAT NEWS)