CEBU, Philippines — Magpapili sa pagka-bise mayor sa Siyudad sa Talisay si Konsehal Doroteo Emit sa sunod tuig nga piniliay batok ni Bise Mayor Alan Bucao.
Nisibaw ang maong plastada sa politika human si Emit ang giwagtang sa listahan sa Partidong Alayon nga pinangulohan ni Kongresista Gerald Anthony “Samsam” Gullas. Gusto ni Emit nga humanon ang iyang termino isip konsehal apan bukas sab siya sa ubang plano sama sa pagdagan atbang ni Bucao nga iyang gikasungi.
Hinoon si Bucao sa iyang bahin niingon nga ang matag tawo adunay katungod sa pagpapili.
Si Bucao maoy tandem ni Gullas nga magpapili sa pagka-mayor samtang ang ilang konsehal mao ang mga magpasubli nga sila si Socrates Fernandez, Julian “Teban” Daan, Rodulfo Cabigas, Antonio “Jojo” Bacaltos, Manuel Cabriana, Gail Restauro, Arturo Bas.
Ang motapos na sa termino nga si Richard Francis “Choy” Aznar ang nituboy sa iyang amahan nga si Ricky hulip sa iyang luna samtang si Valeriano Ylanan nipasulod sa iyang asawa nga kanhi kapitan nga si Ofelia. Nangita pa sila og usa nga maoy mokompleto sa ilang line-up. (BANAT NEWS)