Liboan nitambong sa Alay Lakad sa Lapu-Lapu

CEBU, Philippines — Kapin 20 mil ka mga tawo  ang nanguyog sa gipahigayon nga Alay  Lakad 2018  nga  nagsilbi na nga tinuig nga kalihokan sa kagamhanan  sa Dakbayan sa Lapu-Lapu sama sa gihimo usab sa ubang local government units.

Alas  6 sa buntag kagahapon nangabot-abot ang mga nagkadaiyang sector sa katilingban ug mga  kawani sa kagamhanan sa maong dakbayan aron pagsalmot niini.

Si  Andy  Berame  nga maoy pangulo  sa City Disaster Risk Reduction Management Office  miingon nga nahuman kini alas  11  pasado na ang takna sa buntag kagahapon.

Si Mayor  Paz Radaza miapil sa mga nanglakaw  sa kadalanan sa dakbayan  agi og pagpakita og maayong ehemplo sa katawhan.

Gibuksan dayon ang  pagpanawat og mga donasyon nga  salapi gikan sa mga nanguyog sa maong kalihokan.

Ang mga nanguyog gikan sa nagkadaiyang pribadong kompanya, indibidwal, kabomberohan, kapolisan, mga sakop sa  Philippine   Air Force ug  uban  pa.

Ang  matigom nga salapi gamiton alang sa pagpadayon nga scholarship program sa mga kabus nga kabataan sa dakbayan nga nagtinguhang makatapos og kolehiyo.

Sa miaging tuig 2017 si Ermelita Degamo, City Social Welfare Officer  miingon nga miabat  og P700 mil ang natigom nilang donasyon gikan sa mga nitambong sa Alay Lakad nianang tuiga. (BANAT NEWS)