CEBU, Philippines — Mapasalamaton si Ilocos Norte Governor Imee Marcos sa pagsalig ni Presidente Rodrigo Duterte ngadto sa iyang igsuon nga si kanhi Senador Ferdinand “Bongbong” Marcos Jr. isip maoy haum nga mohulip kaniya kung manaug siya sa pwesto.
Apan matud ni Marcos lisud kini nga trabaho ug ang haum ug maayo nga modumala sa nasud alang sa kausaban mao lang si Duterte tungod sa kalig-on sa mga desisyon niini.
Nagtuo si Marcos nga napuno na lang gyud ang Presidente sa mga problema nga giatubang nga gikalambigitan sa mga kaalyado niini hinungdan nga kini nialma.
Wala pa usab matino kung unsay daganan ni Bongbong sa sunod eleksiyon ilabi nga anaa pa ang iyang protesta sa kandidatura sa pagka-bise presidente batok ni Bise Presidente Leni Robredo.
"We're eagerly waiting the decisions they will make. Ang totoo nagtataka rin ako kung bakit tatatlong probinsiya lang yan a, as you know it's Camarines Sur, Iloilo, Negros Oriental. Tatlo lang e and this taking them forever to count already," matud ni Marcos atol sa 888 News Forum sa Marco Polo Plaza kagahapon.
Duha na ka tuig ang protesta ni Bongbong nga anaa sa Presidential Electoral Tribunal (PET).
Samtang nagkaduol na sab ang eleksiyon sunod tuig, buot si Imee nga ma-review ang kontrata sa Commission on Elections tali sa Smartmatic nga maoy service provider sa automated elections.
Malaumon sab siya nga dunay re-organization nga mahitabo sa Comelec aron mapatuman gyud ang kausaban.
Si Marcos dinhi sa Sugbo isip dinapit sa kalihukan sa League of the Municipalities in the Philippines (LMP) -Visayas Cluster.
Wala pa hinoon modeklarar si Imee kung magpapili siya sa pagka-senador sunod eleksiyon apan malipayon siya sa iyang pagsuroy-suroy sa pipila ka lugar sa nasud. (Nova Jane A. Yanson/GMR)(BANATNEWS)