CEBU, Philippines — Usa ka puya nga gibanabana nga anaa sa upat ngadto sa lima ka bulan ang nakit-an diha sa iniduro sa usa sa mga pansayan sa Cebu South Bus Terminal (CSBT) niadtong Domingo sa gabi.
Matud ni Joey Herrera, manager sa CSBT nga nakadawat siya og tawag gikan sa empleyado sa terminal nga ang tiglimpyo sa pansayan nakakita sa maong puya.
Wala pa masayri kinsa ang nagbutang o nagbilin sa maong puya ug padayon pa karon kining giimbestigaran sa kadagkuan sa terminal ug ingon man sa kapolisan.
Ang footage nga kuha sa Close Circuit Television (CCTV) camera sa terminal dili maklaro kon kinsa ang nasulod sanglit layo kini sa pansayan
Kagahapon sa buntag gisuwayan og recover ang maong puya sa maintenance personnel sa CSBT uban sa mga polis ug taga punerarya apan wala nay nakita sa iniduro.
Giingong posibleng nabanlas ang maong puya diha sa pansayan. (BANAT NEWS)