CEBU, Philippines – Wala gitago ni Talisay City Mayor Eduardo Gullas ang kabalaka sa iyang seguridad ilabi na sa sunod-sunod ang pagpamatay sa mga prominenteng mga tawo sa gobiyerno.
Matud ni Gullas nga nasubo siya sa mga panghitabo kay matag karon ug unya aduna’y mga tawo nga mabalita nga nahagba sa kadalanan tungod kay gipusil.
Gisanglitanan ni Gullas ang usa ka mayor sa Batangas ang gipusil patay atol sa flag raising ceremony ug usa ka abogado sa Sugbo gipusil patay sulod sa iyang panimaye ug uban pa.
Siya nagkanayon nga ang usa ka politiko nga magpapili sa nagkalain-laing posisyon mao ang pagserbisyo sa katawhan apan siya nakapangutana kun nganong maabot sa punto nga patyon.
Samtang ang gidudahang utok sa pagpamusil sa magtiayong Solima nga magsuong Alberto Baluyos Jr. ug manghud nga si Alvin Baluyos ang pormal na nga gipasakaan og kaso kagahapon lakip na ang unang dinakpan nga si Ricarte Del Corro.
Si Cebu City Police Office director, Senior Supt. Royina Garma, nagkanayon nga dili pa matawag nga case closed ang kaso sanglit padayunon gihapon ang imbestigasyon niini ilabi na nga wala pa madakpi ang ikaupat nga suspek.
Sumala pa sa hepe sa Investigation and Detective Management Branch sa CCPO, Supt. Ryan Devaras, nga sa ilang pagtuo usa ka hitman ang unang dinakpan nga si Del Corro alyas Bluefox ug gibayran kini sa mga Baluyos nga maoy mopusil ni Atty. Salvador Solima ug sa asawa niini nga si Verose Solima.
Masaligon si Devaras nga lig-on ang ilang gipasakang kasong murder ug frustrated murder batok sa tulo ka suspek sanglit aduna silay tulo ka saksi nga makapamatuod nga sila gyud ang mamumuno.
Matud ni Devaras nga usa sa mga saksi gikaatubang pa ni Del Corro ug nagpakilooy nga undangan na ang pagpamusil.
Ang mga Baluyos giingong adunay gipanag-iyang yuta nga gitukuran nang daan og paabangang mga kwarto nga gibaligya ngadto kang Verose niadtong 2016 apan wala pa maimpas og bayad. (Camille L. Pateres/GMR)(BANAT NEWS)