CEBU, Philippines – Gidakop ang 35-anyos nga lalaki dihang nasakpan nga namutol og mga kahoy sa Campensa, Manipis, Dakbayan sa Talisay niadtong Miyerkules sa buntag.
Ang dinakpan nailhan nga si Apolonio Resureccion Laborada, nagpuyo sa maong lugar.
Si PO1 Ener Restauro sa Talisay City Police Station nagkanayon nga nakadawat sila og tawag gikan sa siyudad ingon man sa Department of Environment and Natural Resources (DENR) aron sa pag-asistar labot sa pagpamutol og kahoy sa timberland o protected land.
Daling gisaka sa mga awtoridad ang lugar ug didto ila gyud naabtan si Laborada nga nagsige og tigbas sa kahoy nga Gemilina sa lugar samtang sa iyang kilid mao ang mga pinutol na nga kahoy.
Asoy pa ni Restauro nga daghan na nga taho labot sa pagpamutol og kahoy sa lugar ug gani si Kapitan Emma Cabiluna nitataw nga magsige sila og kadungog sa pagpamutol og kahoy sa ilang dapit apan nahadlok lang sila kay mga armado ang nagpasiugda niini.
Ang dinakpan gidala sa TCPS ug gitanggong sa bilanggoan samtang kagahapon gipasakaan kini og kaso. (/GMR)(BANAT NEWS)