CEBU, Philippines — Nagkinto ang kapulisan sa rehiyon sa pagpatuman aning bag-o nga direktiba ni Presidente Rodrigo Duterte sa paghipos sa mga istambay sa kadalanan aron dili sila makalapas sa katungod sa tawo.
"We will not go beyond our actions," sigon pa ni Chief Superintendent Debold Sinas isip pasalig nga ang kapulisan nga mag-amping nga di makalapas sa katungod sa mga tambay.
Ang maong pasalig giluwatan ni Sinas tungod sa nahitabo didto sa Quezon City Police District Station 4 diin usa ka estambay nga ilang gisikop ug gibalhog sa prisohan ang namatay niadtong Hunyo 18. Ang maong dinakpan nga si Genesis “Tisoy” Argoncillo, nadakpan sa pulis nga nag-estambay ug napatay sa mga kauban niini sa sulod sa presinto, tungod kuno sa wala pagsunod sa lider sa presinto.
Niadtong Hunyo 13 miisyu og direktiba si Duterte nga ipahipos ang mga estambay apil niini kadtong mga maghukas-hukas, maglaroy-laroy ug mag-inom diha sa kadalanan. Matud pa ni Sinas, adunay lain-laing paagi ang kapulisan sa mga probinsya ug siyudad aron pagsiguro nga hapsay ang pagpatuman niini. Sa labing bag-o nga rekord sa kapulisan sa rehiyon 1,179 na ka tawo ang gibadlong sa kapolisan sukad pa lang sa pag-isyu sa direktiba ni Presidente Duterte.
Ang Cebu Provincial Police Office nga nakasakop na og 557; Mandaue City Police Office 143; Cebu City Police Office, 408; Lapu-Lapu City Police Office, 63; Negros Oriental Provincial Police Office, 4; Bohol Provincial Police Office,4; samtang wala’y nadakpan sa Siquijor Provincial Police Office.
Mipasabot ang mga opisyales sa kapulisan nga ang maong mga estambay wala una nila gisikop kondili ilaha rang gibadlong ug gipapauli apan gipasidan-an nga di na mousab. Ang masakpan sa sunod ilaha nang pasakaan og kaso depende unsa ilang nalapas nga ordinansa sa lokalidad sa drunkenness, public disturbance, curfew ug uban pa.
Sigon pa ni Senior Superintendent Manuel Abrugena, direktor sa CPPO sa pagpatuman sa kamandoan sa presidente wala kini nagpasabot nga ilang gihikawan sa ilang kagawasan ang mga tawo, matud niya pagpugong sa pagsaka sa kriminalidad.
“While we are doing this, we are not curtailing the rights of our citizens na mag-loiter around, ang amin lang po dito on why we are doing this is to minimize, or ma-lower ang possibility na mag-commit nga crime,” sigon pa ni Abrugena.
Sa Dakbayan sa Sugbo, sagad sa mga gipangbadlong mao kadtong nag-inom kilid sa dalan, pataka og panigarilyo; naghukas-hukas og sinina; dispatser; curfew; nanglabay og bato ug mga nakakita og away. Ang mga minor de edad nga nasikop sa curfew gitugyan ngadto sa mga barangay officials, ginikanan, guardians ug Department of Social Welfare and Development.
Sa Mandaue City adunay 40 ka mga menor de edad nga gisita ug gisikop tungod sa curfew. (Romeo Limpangog ug Rowena Capistrano/IBM)(BANATNEWS)