CEBU, Philippines – Patay ang usa ka 42-anyos nga lalaki human kini dunggaba sa duha ka wala mailhing kriminal niadtong Sabado sa kadlawon diha sa V. Aranas Extension, Barangay Duljo Fatima, Dakbay sa Sugbo.
Si Senior Police Officer 2 Wetzel Berry sa homicide sa Cebu City Police Office (CCPO) miila sa biktima nga si Christopher Alonzon Bangot, residente usab sa maong dapit kinsa kalit lang giduol sa duha ka wala mailhing lalaki ug gitabangan og dunggab.
Si Bangot kinsa nakaangkon og mga samad dinunggaban sa lawas patay na nga nadangat ngadto sa tambalanan.
Ang mga kriminal daling misibat ug padayon pa kining gipangita sa kapolisan.
Base sa imbestigasyon sa kapolisan nasuta nga si Bangot napriso niadtong tuig 2015 tungod sa kaso kalabutan sa paghupot og armas nga walay lisensiya. (/BDB)(BANAT NEWS)