Pasahero ang paablihon sa bagahe
CEBU, Philippines – Gimandoan ni Pres. Rodrigo Duterte ang Bureau of Customs nga kinahanglan ang tag-iya sa bag o bagahi maoy moabli sa ilang bag kon mosulod sa airport.
Mao kini ang kabahin sa speech atol sa inagurasyon sa modernong Mactan Cebu International Airport Terminal 2 sa dakbayan sa Lapu-Lapu kagahapon sa hapon. Matud ni Duterte nga dili siya ganahan nga ang mga taga customs ang moabli sa mga bag sa mga pasahero.
Pipila ka buwan na ang nakalabay, daghang mga pasahero ilabi na ang mga Overseas Filipino Workers hasta ang Balikbayan ang nitiyabaw tungod sa kontrobersiyal nga “tanim bala” didto sa Ninoy Aquino International Airport diin ang mga pasahero giingong gipangilkilan sa mga airport personnel. Matud pa ni Duterte, ang MCIA usa sa mga “best airports in Asia” ug ang maong pasilidad magpakita sa unsay kinanindotan sa Pilipinas.
Gawas nga nalipay siya, giangkon ni Duterte nga nasuya siya sa Cebu kay naa nay tugpahanan nga sama niini ka moderno sa MCIA. Sumala pa niya, nahimo siyang mayor sa Davao sud sa 23 ka tuig apan walay airport sama sa MCIA nga natukod didto.
“The airport will showcase to the world the unique culture and heritage of Cebu. The airport will promote tourism and economic activity to Cebu. It will lead to economic boost and open for more infra- projects under build-build (program). This airport is the symbol of pride and beacon of progress,” matud pang Duterte.
Samtang, sa dili pa mahimong operational ang bag-ong terminal mamahimo kining pasuroyan sa mga tawo sud sa pipila ka adlaw sugod sa kataposang bahin sa Hunyo matud pa ni Steve Dicdican ang general manager sa MCIA.
Gipaabot nga kon operational na kini mosaka ang terminal fee sa international flights og P100 gikan sa kasamtangang P750 ngadto sa P850.
Ipaubos usab sa renovation ang Terminal 1 alang sa domestic flights. (/IBM)(BANAT NEWS)
- Latest
