Kapolisan, pamilya ni Imok moduso og MR

CEBU, Philippines — Buot mopasaka og motion for reconsideration (MR) ang kabanay ni anhing Ermita barangay kapitan Felicisimo “Imok” Rupinta human gibasura sa piskaliya ang kaso batok kang Winefredo Miro.

Ang deputy chief sa Regional Special Operations Group-7, Senior Inspector Ricardo Bertulfo Tero, niingon nakighinabi na sila sa kapuyo ni Rupinta labot sa plano. Ang RSOG-7 ang nipasaka sa kaso batok ni Miro.

Base sa resolusyon ni Assistant Provincial Prosecutor Hyacinth Jadraque nga gikuwangan siya sa mga pruweba nga gipresentar aron suportahan ang pasangil batok kang Miro.

Si Miro, kinsa kanhi Cebu City Market Administrator, maoy gipasakahan sa RSOG-7 og kasong murder ug attempted murder human siya ang gitumbok nga utok sa pagpamanhig patay kang Rupinta niadtong  Nobiyembre 23, 2017 sa Lungsod sa Liloan.

Naangol sa maong krimen ang kapuyo ni Rupinta nga si Jocelyn Mendoza.

Gipasanginlan si Miro nga maoy nagsugo sa mga gikatahapang hitman nga sila si Jimmy Largo ug Jordan Gera aron patyon ang kapitan.

Samtang girespetaran ni Konsehal Jose Daluz III ang desisyon sa piskaliya apan gikonsiderar gihapon niini si Miro nga mastermind sa krimen.

“While the prosecutor was not satisfied, it does not mean that Miro is not a suspect. He remains the main culprit and the co-mastermind whoever he is,” matud ni Daluz.

Si Daluz niingon ang ilang grupo sa Barug-Partido Demokratiko Pilipino-Lakas ng Bayan (PDP-Laban) ang padayon nga motabang sa pamilya ni Rupinta aron ang hustisya makab-ot.

Kini niingon nga ang desisyon sa piskaliya dili makapugong nila sa pagpangita og dugang ebidensiya batok kang Miro.

Bisan og taas ang proseso malaumon ang konsehal nga makab-ot ang hustisya sa pamilya ni Rupinta.

Giangkon ni Daluz nga siya nagduda nga ang Prosecutor’s Office mopabor kang Miro dungan sa pagbutyag nga ang mga ebidensiya testimonya gikan sa killer nga nag-link sa mastermind.

Si Daluz nitug-an nga nasagmuyo siya sa maong desisyon.

“Yes, disappointed. But we will continue the fight for justice. Justice is slow but always coming,” he said. Si Mayor Tomas Osmeña niingon nga dili mabuhat ni Miro ang maong krimen kay wala kini ikabayad sa mga killers.

“Miro has no money because I lend him money. He simply can’t afford it,” matud ni Osmeña. (BANAT NEWS)