SK Federation elections sa probinsya karong Hunyo 8

CEBU, Philippines – Human sa dakbayan sa Sugbo, ang lalawigan sa Sugbo na usab ang mopili sa Sangguniang Kabataan (SK) Federation President sa probinsya karong bulana.

Sa Hunyo 8, maoy schedule nga eleksyon sa pagpili sa SK President sa lalawigan sa Sugbo, kini human nga ang mga lungsod ug dakbayan nahuman na usab og pili sa ilang mga SK Federation President sa ilang lugar,  sumala ni James Canoy ang pangulo sa Provincial Youth Commission (PYC).

Hinoon wala pay lugar kon asa ipahigayon ang maong piniliay. 51 ka mga  SK gikan sa nagkadaiyang local government units ang gipaabot nga motambong sa maong kalihokan ug mobotar sa ilang lider sa tibook lalawigan.

Ang mapilian nga SK Federation President mao kini ang mahimong representante sa mga kabatan-onan ngadto sa hunta probinsyal.

Matud ni Canoy nga base sa balaod PYC ang mapilian nga SK Federation President, otomatik kini nga maapil sa pito ka Commissioner sa PYC.

Sa bahin usab sa local youth development council, ang SK Federation President maoy magsilbing chairman sa tibuok council.  (/IBM)(BANAT NEWS)