CEBU, Philippines – Hingpit na nga natauran og elektrisidad ang barangay nga isla sa Hilantagaan, Santa Fe sa amihanang bahin sa Lalawigan sa Sugbo pinaagi sa labing unang cable submarine power connection sa probinsiya nga proyekto ni Kongresista Benhur Salimbangon.
Abril 5, 2018 gipahigayon sa Department of Energy (DoE), National Electrification Administration (NEA), ug Bantayan Electric Cooperative ang groundbreaking sa P43 milyones nga submarine cable project.
Kini gigastuhan sa NEA ubos sa ilang Barangay Line Enhancement Program (BLEP).
Ang submarine power distribution adunay 2.6 kilometros gikan sa Lungsod sa Sta. Fe ug unang gitinguha nga mahuman sulod sa 120 ka adlaw o upat ka buwan apan kini nahuman lang sa duha ka buwan matud ni Salimbangon.
Sigun pa niya nga gisugdan niya ang pagpangita og pundo alang sa mga proyekto kaniadtong siya pa ang vice chairman sa House Committee on Energy sa iyang niaging termino. (Ericalene S. Tanudtanud/GMR)(BANAT NEWS)